Intant il patriarcje Ludovì di Teck, viodude l'inutilitât des azione diplomatichis, dal 1422 al tente di riconcuistâ il Friûl cu lis armis. Cuntun esercit di mercenaris Ongjarês al realize une largje manovre a cercli: de Basse Furlane al puarte une part des sôs trupis fin a Rosacis e a Manzan, che a vegnin concuistadis; un'altre part dal esercit, pe Alte e dilunc la valade de Fele, e rive fin a Scluse e a Mueç, che a vegnin fiscadis dai soldats. Ma l'esercit de republiche al rive a contrastâ e a mandâ a mont il dopli atac. Une seconde azion e ven inmaniade di Ludovì dal 1431. Cun tun esercit di cincmîl Ongjarês ancjemò une volte al rive a jentrâ in Friûl, rivant fin a Manzan e di lì, cun 1500 cjavalîrs al tire dilunc fin a lis puartis di Udin. Ma inmò une volte i Venezians a rìvin a parâ l'atac e a fâ scjampâ lis trupis patriarcjâls.
          Lis ripetudis e tremendis crudeltâts dai doi esercits (l'Abazie di Rosacis e fo fiscade e ai difensors e fo çoncjade la man destre de bande dai Ongjarês, intant che i Venezians, dopo de distruzion di Manzan, a copàrin o a gjavàrin i voi a ducj i presonîrs) a finìrin par dislontanâ i Furlans des cuistions patriarcjâls, puartantju, par amôr di pâs, ad acetâ i fats.
          Dopo dal tratât di pâs tra Vignesie e l'imperadôr dal S.R.I. Sigjismont (1435) e la decision dal pape di nomenâ, doi vicjaris par proviodi aes necessitâts spirituâls de diocesi di Aquilee restade in teritori venit, il patriarcje Ludovì al restà sence nissune poe diplomatiche.
          Al fo chest un grâf moment de storie dal Friû. Difat, se di une bande la vite economiche e pulitiche e jere savoltade dal continuât scuintrasi dai esercits aversaris sul teritori de regjon, di chealtre bande no mancul piês a jerin i dams provocâts ancje ae vite spirituâl e religjose locâl pal fat che, amancul dal pont di viste uficiâl, il titolâr de diocesi acuileiese al jere simpri il midiesim patriarcje, che ancje dopo de invasion veneziane veve sede stabil a Udin. ...................